၁ စက်တင်ဘာ ၂၀၂၆ (Eastern ThanLwin)
ကိုဇက်
အရှေ့အလယ်ပိုင်းဒေသမှာ ရက်ပေါင်း (၂၀၀) ကျော်ကြာ တာဝန်ထမ်းဆောင်ခဲ့တဲ့ အမေရိကန်ရေတပ် လေယာဉ်တင်သင်္ဘော USS Abraham Lincoln ဟာ ဒီသီတင်းပတ်အတွင်း ထိုင်းနိုင်ငံ ပတ္တယားမြို့အနီးက Laem Chabang ဆိပ်ကမ်းကို ဝင်ရောက်ရပ်နားမှာ ဖြစ်ပါတယ်။
အမေရိကန်စစ်သည်နဲ့ မရိန်းတပ်ဖွဲ့ဝင် စုစုပေါင်း (၅,၀၀၀) နီးပါး ပါဝင်တဲ့ သင်္ဘောအဖွဲ့ဟာ ရက်ပေါင်း ၂၀၀ ကျော် ပင်လယ်ပြင်မှာ တာဝန်ထမ်းဆောင်ပြီးနောက် အနားယူဖို့အတွက် ထိုင်းနိုင်ငံကို ဝင်ရောက်လာတာ ဖြစ်ပါတယ်။
အဆိုပါ လေယာဉ်တင်သင်္ဘောနဲ့အတူ အမေရိကန်ရေတပ် သင်္ဘော ၂ စီးလည်း လိုက်ပါလာမယ်လို့ ထိုင်းအာဏာပိုင်တွေက ပြောပါတယ်။
သင်္ဘောမဝင်ရောက်မီမှာပဲ ပတ္တယားရဲတပ်ဖွဲ့က ကမ်းခြေနဲ့ နာမည်ကြီး ညဘက်အပန်းဖြေဇုန်တွေမှာ လုံခြုံရေးနဲ့ စောင့်ကြည့်မှုတွေ တိုးမြှင့်လုပ်ဆောင်နေပါတယ်။
ပြီးခဲ့တဲ့ သီတင်းပတ်ကုန်ကလည်း ရဲတပ်ဖွဲ့က စစ်ဆေးဖမ်းဆီးမှုတွေ ပြုလုပ်ခဲ့ပြီး ပြည့်တန်ဆာလုပ်ငန်းနဲ့ ပတ်သက်တယ်လို့ သံသယရှိသူ ၄၀ ကနေ ၅၀ ခန့်ကို ထိန်းသိမ်းခဲ့ပါတယ်။
ပတ္တယားရဲတပ်ဖွဲ့မှူး Anek Srathongyoo ကတော့ ပြည့်တန်ဆာလုပ်ငန်းကို ထိန်းချုပ်ဖို့ ကြိုးစားနေကြပေမယ့် လူတွေက အာဏာပိုင်တွေ မသိရှိဘဲ အများပြည်သူနေရာတွေမှာ ဖောက်သည်ရှာနိုင်တာကြောင့် ထိန်းချုပ်ဖို့ ခက်ခဲနေတယ်လို့ ပြောပါတယ်။
ထိုင်းနိုင်ငံမှာ ပြည့်တန်ဆာလုပ်ငန်းဟာ ဥပဒေအရ တရားမဝင်ပေမယ့် ဘန်ကောက်နဲ့ ပတ္တယားလို ခရီးသွားမြို့ကြီးတွေမှာတော့ လိင်ပိုင်းဆိုင်ရာ ဖျော်ဖြေရေးလုပ်ငန်းတွေကို ပွင့်ပွင့်လင်းလင်း တွေ့မြင်နေရဆဲ ဖြစ်ပါတယ်။
စီးပွားရေးအတွက် မျှော်လင့်ချက်
အမေရိကန်ရေတပ်သား ထောင်နဲ့ချီ ပတ္တယားကို ရောက်ရှိလာမှာကြောင့် ဒေသတွင်း စီးပွားရေးလုပ်ငန်းတွေအတွက်တော့ မျှော်လင့်ချက်တွေ မြင့်တက်လာပါတယ်။
ပတ္တယားမြို့တော်ဝန် Poramase Ngampiches ရဲ့ ခန့်မှန်းချက်အရ အမေရိကန်စစ်သည်တစ်ဦးဟာ ကမ်းပေါ်မှာ နေထိုင်တဲ့အချိန်နဲ့ ညအိပ်၊ မအိပ်ပေါ်မူတည်ပြီး တစ်နေ့ကို ထိုင်းဘတ် (၁,၀၀၀) ကနေ (၃,၀၀၀)အထိ သုံးစွဲနိုင်ပါတယ်။
ဒါကြောင့် စားသောက်ဆိုင်တွေ၊ ဟိုတယ်တွေ၊ သယ်ယူပို့ဆောင်ရေးနဲ့ အပန်းဖြေဝန်ဆောင်မှုလုပ်ငန်းတွေမှာ ရေတိုအတွင်း စီးပွားရေးလှုပ်ရှားမှု ပိုမိုကောင်းမွန်လာနိုင်တယ်လို့ မြို့တော်ဝန်က ပြောပါတယ်။
ဒါပေမယ့် သင်္ဘောပေါ်က စစ်သည်အားလုံး တစ်ချိန်တည်း ကမ်းပေါ်ဆင်းမှာမဟုတ်ဘဲ အလှည့်ကျ Shore Leave ပေးသွားမှာ ဖြစ်ပါတယ်။
လိင်ပိုင်းဆိုင်ရာ အမြတ်ထုတ်မှု အန္တရာယ်
တစ်ဖက်မှာတော့ အမေရိကန်စစ်သည် အများအပြား တစ်ချိန်တည်း ပတ္တယားကို ရောက်လာတာဟာ မြို့ရဲ့ လိင်ဖျော်ဖြေရေးလုပ်ငန်းအတွက်လည်း ဝင်ငွေတိုးလာစေနိုင်တာကြောင့် လိင်ပိုင်းဆိုင်ရာ အမြတ်ထုတ်မှုနဲ့ ကျန်းမာရေးအန္တရာယ်တွေ မြင့်တက်လာနိုင်တယ်လို့ ကျွမ်းကျင်သူတွေက သတိပေးပါတယ်။
ဘန်ကောက်တက္ကသိုလ်က ခရီးသွားလုပ်ငန်းနဲ့ လူသားဆိုင်ရာဘာသာရပ်ဆိုင်ရာ တွဲဖက်ပါမောက္ခ Pipatpong Fakfare က ဖောက်သည်အရေအတွက် ရုတ်တရက်များပြားလာရင် လိင်ပိုင်းဆိုင်ရာ အမြတ်ထုတ်မှု ဖြစ်နိုင်ခြေနဲ့ လိင်မှတစ်ဆင့် ကူးစက်တဲ့ရောဂါတွေ ပျံ့နှံ့နိုင်ခြေ မြင့်တက်လာနိုင်တယ်လို့ ပြောပါတယ်။
ဒါ့အပြင် လေယာဉ်တင်သင်္ဘောပေါ်မှာ တာဝန်ထမ်းဆောင်နေတဲ့ စစ်သည်တွေကြား စိတ်ဖိစီးမှုနဲ့ ကိုယ့်ကိုယ်ကို သတ်သေဖို့ ကြိုးစားမှုတွေ ရှိခဲ့တယ်ဆိုတဲ့ သတင်းတွေ ထွက်ပေါ်ထားတာကြောင့် ဒီကိစ္စဟာ နောက်ထပ် စိုးရိမ်စရာတစ်ခု ဖြစ်လာတယ်လို့လည်း သူက ဆိုပါတယ်။
ပတ္တယားအတွက် မျှော်လင့်ချက်
ပတ္တယားဟာ မူလက ငါးဖမ်းရွာတစ်ရွာဖြစ်ပေမယ့် ဗီယက်နမ်စစ်ပွဲကာလအတွင်း အမေရိကန်စစ်သည်တွေ အပန်းဖြေလာရောက်ခဲ့ရာကနေ ခရီးသွားလုပ်ငန်း အကြီးအကျယ် ဖွံ့ဖြိုးလာခဲ့တဲ့ မြို့တစ်မြို့ ဖြစ်ပါတယ်။
အခု အမေရိကန်စစ်သည် ထောင်နဲ့ချီ ပြန်လည်ဝင်ရောက်လာမယ့်သတင်းဟာ လက်ရှိ စီးပွားရေးနှေးကွေးနေတဲ့ ပတ္တယားအတွက် မျှော်လင့်ချက်တစ်ခု ဖြစ်နေပါတယ်။
Chonburi Tourism Federation ဥက္ကဋ္ဌ Thanet Supornsahasrungsi ကတော့ အမေရိကန်စစ်သည်တွေ ဘယ်နေရာတွေမှာ အချိန်ကုန်ဆုံးကြမလဲဆိုတာက စီးပွားရေးအပေါ် သက်ရောက်မှုရှိမယ်လို့ ပြောပါတယ်။ တချို့က ဘန်ကောက်အထိ သွားရောက်နိုင်တာကြောင့် ပတ္တယားမှာပဲ ငွေသုံးစွဲမယ့်ပမာဏကို တိတိကျကျ ခန့်မှန်းလို့မရသေးပါဘူး။
ပတ္တယား Nightlife Business Association ဥက္ကဋ္ဌ Lisa Hamilton ကတော့ အမေရိကန်ရေတပ်သင်္ဘော ပတ္တယားကို ဝင်ရောက်မယ်ဆိုတဲ့သတင်းဟာ လက်ရှိ စီးပွားရေးအခြေအနေအတွက် မျှော်လင့်ချက်တစ်ခု ဖြစ်လာတယ်လို့ ပြောပါတယ်။
သူမက ပတ္တယားမှာ နှစ်ပေါင်း ၂၀ ကျော် နေထိုင်ခဲ့ပေမယ့် ဒီနှစ်လောက် စီးပွားရေးနှေးကွေးတဲ့နှစ်မျိုး တစ်ခါမှ မတွေ့ဖူးဘူးလို့လည်း ပြောထားပါတယ်။
အမေရိကန်ရေတပ်ရဲ့ USS Abraham Lincoln ဟာ နိုဝင်ဘာလအတွင်း အမေရိကန်နိုင်ငံ San Diego ဆိပ်ကမ်းကနေ ထွက်ခွာခဲ့ပြီး နောက်ပိုင်း အရှေ့အလယ်ပိုင်းဒေသကို လမ်းကြောင်းပြောင်းကာ စစ်ဆင်ရေးတွေမှာ ပါဝင်ခဲ့ပါတယ်။
ယခု ထိုင်းနိုင်ငံ ပတ္တယားအနီး Laem Chabang ဆိပ်ကမ်းကို ဝင်ရောက်ရပ်နားခြင်းဟာ ရက်ပေါင်း ၂၀၀ ကျော် ပင်လယ်ပြင်မှာ တာဝန်ထမ်းဆောင်ခဲ့ပြီးနောက် အနားယူဖို့အတွက် ဖြစ်ပါတယ်။
