၈ အောက်တိုဘာ ၂၀၂၆ (Eastern ThanLwin )
IM
မြန်မာနိုင်ငံ ပတ်ဝန်းကျင်ထိန်းသိမ်းရေးဦးစီးဌာနက အောက်တိုဘာ ၅ ရက်မှာ တာချီလိတ်မြို့နယ်အတွင်းရှိ မြစ်ချောင်းတွေကနေ ရေနမူနာတွေကို နေရာ ၆ နေရာမှာ ကောက်ယူခဲ့ပါတယ်။
အဲဒီဌာနက ရေရဲ့ အက်ဆစ်ဓာတ်၊ လျှပ်စစ်စီးကူးနိုင်မှုနဲ့ အောက်ဆီဂျင်ပျော်ဝင်မှုတို့ အပါအဝင် ရုပ်ပိုင်းဆိုင်ရာ အချက် ၁၁ ချက်ကို နေရာမှာတင် တိုင်းတာခဲ့ပါတယ်။
ဒါ့အပြင် လေးလံတဲ့သတ္တု အချက် ၁၁ ချက်ကို စစ်ဆေးဖို့အတွက် ရေနမူနာတွေကို ရှမ်းပြည်နယ် ရေအရည်အသွေးဓာတ်ခွဲခန်းကို ပို့ဆောင်ထားပါတယ်။
ထိုင်းဘက်မှာလည်း ချင်းရိုင်ပတ်ဝန်းကျင်ဌာနက ဆိုင်းမြစ်အတွင်း အာဆင်းနစ်ပမာဏဟာ ဘေးကင်းရေးစံနှုန်းထက် ကျော်လွန်နေတယ်လို့ ပြောထားပြီး၊ စောင့်ကြည့်စစ်ဆေးမှုတွေကို ဆက်လက်လုပ်ဆောင်နေပါတယ်။
ချင်းရိုင်အုပ်ချုပ်ရေးမှူးကလည်း ရပ်ကွက် ၄ ခုမှာရှိတဲ့ ဒေသခံတွေကို မြစ်ရေကို သောက်သုံးတာ၊ ချက်ပြုတ်တာ၊ ပန်းကန်ဆေးတာ၊ ရေခဲပြုလုပ်တာနဲ့ အစားအစာထုတ်လုပ်တာတွေအတွက် မသုံးကြဖို့ သတိပေးထားပါတယ်။
မိုးရွာသွန်းမှု ရပ်တန့်သွားပြီးနောက် မြစ်ရေအရောင် ပိုမိုနက်မှောင်လာတာကလည်း ဒေသခံတွေကို စိုးရိမ်မှုတွေ ဖြစ်ပေါ်စေပါတယ်။
ကျန်းမာရေးစစ်ဆေးမှုမှာတော့ လူ ၅၆၉ ဦးကို စစ်ဆေးခဲ့ရာ ၃၁ ဦးရဲ့ ခန္ဓာကိုယ်ထဲမှာ အန္တရာယ်ရှိတဲ့ ဓာတုပမာဏတွေ တွေ့ရှိခဲ့ပါတယ်။
အဲဒီလူတွေကို အသေးစိတ်စစ်ဆေးမှုတွေကိုတော့ နှစ်ကုန်ပိုင်းမှာ ဆက်လက်ပြုလုပ်သွားမယ်လို့ သိရပါတယ်။
မြစ်ဝှမ်းဒေသမှာရှိတဲ့ လယ်မြေ ဟက်တာ ၇၀,၀၀၀ ခန့်ဟာလည်း အဲဒီရေအရင်းအမြစ်ပေါ်မှာ မှီခိုနေရပါတယ်။
တာချီလိတ်ဘက်မှာ ရေနမူနာတွေ ကောက်ယူစစ်ဆေးတာကတော့ လစဉ်စောင့်ကြည့်ရေးအစီအစဉ်ရဲ့ တစ်စိတ်တစ်ပိုင်းအဖြစ် ဆောင်ရွက်ခဲ့တာ ဖြစ်ပါတယ်။
ကျွမ်းကျင်သူတွေကလည်း ပြဿနာရဲ့ အရင်းအမြစ်ကို ဖြေရှင်းနိုင်ဖို့အတွက် မြန်မာနိုင်ငံကနေ သတ္တုတင်သွင်းမှုကို ယာယီရပ်ဆိုင်းဖို့ ထိုင်းအစိုးရကို တိုက်တွန်းနေကြပါတယ်။

