၁၉ အောက်တိုဘာ ၂၀၂၆ (Eastern ThanLwin)
IM
အရှေ့တောင် အာရှ အမျိုးသား လူ့အခွင့်အရေး အဖွဲ့အစည်းများ ဖိုရမ်က ယနေ့ အောက်တိုဘာ ၁၉ ရက်မှာ မြန်မာ့အမျိုးသား လူ့အခွင့်အရေးကော်မရှင်ကို ဒေသတွင်း အဖွဲ့တစ်ခုမှ ထုတ်ပယ်လိုက်တယ်လို့ ထုတ်ပြန်ချက်အရ သိရပါတယ်။
ကော်မရှင်သည်အဖွဲ့၏ အဓိပ္ပာယ် သတ်မှတ်ချက်နဲ့ မကိုက်ညီတော့ဟု ဖိုရမ်က ဆိုထားပြီး ကော်မရှင်သည် ၂၀၂၇ ခုနှစ် အလှည့်ကျ ဥက္ကဋ္ဌ တာဝန်ကိုလည်း ဆုံးရှုံးခဲ့ရပြီး ဖိုရမ်၏ နှစ်ဆယ့်သုံး ကြိမ်မြောက် နှစ်ပတ်လည် ညီလာခံသို့လည်း တက်ခွင့် မရှိတော့ဟု ဆိုပါတယ်။
ဖိုရမ်၏ အုပ်ချုပ်ရေး ဘုတ်အဖွဲ့က အောက်တိုဘာ ၁ ရက်က ချမှတ်ခဲ့တဲ့ ဆုံးဖြတ်ချက်သည် ချက်ချင်း အသက်ဝင်ခဲ့တာလို့ ဆိုပြီး အဖွဲ့ဝင် အဖွဲ့အစည်း (၅)ခု၏ ဥက္ကဋ္ဌများက သဘောတူ ဆုံးဖြတ်ခဲ့တာလို့ ဆိုပါတယ်။
အဖွဲ့များမှာ မလေးရှား၊ အင်ဒိုနီးရှား၊ ဖိလစ်ပိုင်၊ ထိုင်းနဲ့ တီမောလက်စ်တေတို့မှ လူ့အခွင့်အရေး ကော်မရှင်များ ဖြစ်ကာ မလေးရှား ကော်မရှင်သည် ယခုနှစ် ဖိုရမ် ဥက္ကဋ္ဌ တာဝန်ကို ယူထားတာပါ။
စစ်ဆေးမှုသည် ဩဂုတ် ၁၄ ရက်က စတင်ခဲ့ကာ ကော်မရှင်သည် လွတ်လပ်သော အဖွဲ့အစည်း ဟုတ်/ မဟုတ်ကို စစ်ဆေးခဲ့တာလို့ ဖော်ပြထားကာ ကော်မရှင်အနေနဲ့ ဖိုရမ် အစည်းအဝေး အားလုံးသို့ တက်ရောက်ခွင့် ဆုံးရှုံးသွားပြီလို့လည်း ဆိုထားပါတယ်။
ပဲရစ် မူဝါဒများနှင့် ကိုက်ညီမှု ရှိမရှိကိုလည်း ကြည့်ခဲ့ကာ ပဲရစ် မူဝါဒများဆိုသည်မှာ လူ့အခွင့်အရေးအဖွဲ့များ လွတ်လပ်စွာ လုပ်နိုင်ရန် သတ်မှတ်ထားသော စံနှုန်းများ ဖြစ်ပြီး ကော်မရှင်ကို စက်တင်ဘာ ၁ ရက်နေ့တွင် စာဖြင့် အကြောင်းကြားခဲ့တာပါ။
ပြန်လည် ရှင်းပြခွင့် ပေးခဲ့ပြီး အောက်တိုဘာ ၁ ရက်နေ့ အစည်းအဝေးသို့လည်း ဖိတ်ကြားခဲ့ရာ ကော်မရှင်က စက်တင်ဘာ ၂၄ ရက်မှာတော့ စာနဲ့ ပြန်ဖြေခဲ့တယ်လို့ ဆိုပြီး စစ်ဆေးမှုကို လက်မခံကြောင်း စက်တင်ဘာ ၂၆ ရက်နေ့တွင် ထုတ်ပြန်ခဲ့ကာ ထိုအဖြေများသည် လုံလောက်မှု မရှိဟု ဘုတ်အဖွဲ့က ဆိုပါတယ်။
စစ်ဆေးမှုမှာ ၂၀၂၁ ခုနှစ်နောက်ပိုင်း ရရှိထားတဲ့ အချက်အလက်များ၊ ၂၀၂၁ ခုနှစ်က ပေးခဲ့သော အကြံပြုချက်များ အပေါ် တိုးတက်မှုကိုလည်း ကြည့်ခဲ့ပြီး ကမ္ဘာလုံးဆိုင်ရာ မဟာမိတ် အဖွဲ့၏ ၂၀၂၄ အစီရင်ခံစာကိုလည်း အသုံးပြုခဲ့တယ်လို့ ဆိုပါတယ်။
