Language:

ကမ္ဘာ့အပူချိန် ၁.၅ ဒီဂရီ ပန်းတိုင်ကို ကျော်လွန်တော့မည်ဟု ကုလသမဂ္ဂ သတိပေး


ကမ္ဘာ့အပူချိန် ၁.၅ ဒီဂရီ ပန်းတိုင်ကို ကျော်လွန်တော့မည်ဟု ကုလသမဂ္ဂ သတိပေး

၂၁ အောက်တိုဘာ ၂၀၂၆ (Eastern ThanLwin)

IM

ကမ္ဘာ့အပူချိန် မြင့်တက်မှုကို စက်မှုခေတ်မတိုင်မီကာလထက် ၁.၅ ဒီဂရီစင်တီဂရိတ်အတွင်း ထိန်းထားနိုင်ရေး ရည်မှန်းချက်ကို မကြာမီ ကျော်လွန်တော့မယ်လို့ ကုလသမဂ္ဂက သတိပေးလိုက်ပါတယ်။

ကုလသမဂ္ဂ ပတ်ဝန်းကျင်အစီအစဉ် (UNEP) က အောက်တိုဘာ ၂၁ ရက်မှာ ထုတ်ပြန်လိုက်တဲ့ ၂၀၂၆ ခုနှစ် ထုတ်လွှတ်မှုကွာဟချက်အစီရင်ခံစာမှာ အခုလို ဖော်ပြထားတာပါ။

နိုင်ငံတွေက လက်ရှိကတိပြုထားတဲ့ ရာသီဥတုဆိုင်ရာ အစီအစဉ်တွေကို အပြည့်အဝ အကောင်အထည်ဖော်နိုင်ရင်တောင် ၂၁၀၀ ပြည့်နှစ်မှာ ကမ္ဘာ့အပူချိန်ဟာ ၂.၆ ဒီဂရီစင်တီဂရိတ်အထိ မြင့်တက်လာနိုင်တယ်လို့ အစီရင်ခံစာက ခန့်မှန်းထားပါတယ်။

လက်ရှိမူဝါဒတွေအတိုင်း ဆက်သွားမယ်ဆိုရင်တော့ အပူချိန်မြင့်တက်မှုဟာ ၂.၈ ဒီဂရီအထိ ရှိလာနိုင်ပါတယ်။

လက်ရှိမှာ ကမ္ဘာ့ပျမ်းမျှအပူချိန်ဟာ စက်မှုခေတ်မတိုင်မီကာလထက် ၁.၄ ဒီဂရီစင်တီဂရိတ်ခန့် မြင့်တက်နေပြီဖြစ်ပြီး ၁.၅ ဒီဂရီပန်းတိုင်ကို လာမယ့်နှစ်အနည်းငယ်အတွင်း ကျော်လွန်သွားနိုင်တယ်လို့လည်း သတိပေးထားပါတယ်။

ဒါ့အပြင် ၂၀၂၅ ခုနှစ်မှာ ကမ္ဘာတစ်ဝန်း ဖန်လုံအိမ်ဓာတ်ငွေ့ထုတ်လွှတ်မှုဟာ စံချိန်တင်အဆင့်မှာ ဆက်လက်ရှိနေခဲ့ပါတယ်။

ကျောက်မီးသွေး၊ ရေနံနဲ့ သဘာဝဓာတ်ငွေ့တို့ကနေ ထွက်ရှိတဲ့ ကာဗွန်ထုတ်လွှတ်မှုဟာလည်း အနည်းငယ် မြင့်တက်ခဲ့ပါတယ်။

အထူးသဖြင့် အမေရိကန်နိုင်ငံမှာ လျှပ်စစ်ဓာတ်အားလိုအပ်ချက် မြင့်တက်လာတာနဲ့ ကျောက်မီးသွေးအသုံးပြုမှု ပြန်လည်များပြားလာတာကြောင့် ထုတ်လွှတ်မှု တိုးလာခဲ့တယ်လို့ အစီရင်ခံစာက ဖော်ပြပါတယ်။

အမေရိကန်က ပါရီရာသီဥတုသဘောတူညီချက်ကနေ နုတ်ထွက်ခဲ့တာကြောင့်လည်း ကမ္ဘာ့အပူချိန်မြင့်တက်မှုဆိုင်ရာ ခန့်မှန်းချက်တွေဟာ ယခင်နှစ်ထက် ပိုမိုဆိုးရွားလာခဲ့ပါတယ်။

ဒါပေမဲ့ ကမ္ဘာ့အပူချိန်ကို ရေရှည်မှာ ၁.၅ ဒီဂရီအောက် ပြန်လည်ရောက်ရှိစေနိုင်မယ့် လမ်းကြောင်းတစ်ခု ရှိနေသေးတယ်လို့ အစီရင်ခံစာက ဆိုပါတယ်။

အဲဒီလမ်းကြောင်းအတိုင်း သွားနိုင်မယ်ဆိုရင် ကမ္ဘာ့အပူချိန်ဟာ ဒီရာစုနှစ်အလယ်ပိုင်းမှာ ၁.၇ ဒီဂရီကနေ ၁.၈ ဒီဂရီအထိ မြင့်တက်လာနိုင်ပေမဲ့ ၂၁၀၀ ပြည့်နှစ်မှာတော့ ၁.၅ ဒီဂရီအောက် ပြန်လည်ကျဆင်းလာနိုင်ပါတယ်။

ဒါပေမဲ့ အဲဒီရည်မှန်းချက် အောင်မြင်နိုင်ခြေဟာ ၅၀ ရာခိုင်နှုန်းခန့်သာ ရှိပါတယ်။ အဲဒီလိုဖြစ်လာဖို့အတွက် ကမ္ဘာ့ဖန်လုံအိမ်ဓာတ်ငွေ့ထုတ်လွှတ်မှုကို ၂၀၃၀ ပြည့်နှစ်မှာ ၂၀၁၉ ခုနှစ်အဆင့်ထက် ၁၈ ရာခိုင်နှုန်း၊ ၂၀၃၅ ခုနှစ်မှာ ၄၅ ရာခိုင်နှုန်းနဲ့ ၂၀၄၀ ပြည့်နှစ်မှာ ၆၉ ရာခိုင်နှုန်းအထိ လျှော့ချဖို့ လိုအပ်တယ်လို့ အစီရင်ခံစာက ဖော်ပြပါတယ်။

ဒါပေမဲ့ နိုင်ငံတွေ လက်ရှိကတိပြုထားတဲ့ အစီအစဉ်တွေအရ ၂၀၃၀ ပြည့်နှစ်မှာ ထုတ်လွှတ်မှုကို ၅ ရာခိုင်နှုန်းကနေ ၈ ရာခိုင်နှုန်းအထိသာ လျှော့ချနိုင်မယ့်အခြေအနေ ရှိနေပါတယ်။

ဒါ့အပြင် လေထုထဲမှာ ရှိနေပြီးသား ကာဗွန်ဓာတ်ငွေ့တွေကိုလည်း ပမာဏအများအပြား ပြန်လည်ဖယ်ရှားဖို့ လိုအပ်မှာဖြစ်ပါတယ်။

ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်ကတော့ ၁.၅ ဒီဂရီပန်းတိုင်ကို ကျော်လွန်သွားတာဟာ လက်လျှော့ရမယ်လို့ မဆိုလိုကြောင်း ပြောပါတယ်။

အပူချိန်ကျော်လွန်မှု ပမာဏကို တတ်နိုင်သမျှ နည်းအောင် လုပ်ဆောင်ဖို့နဲ့ အဲဒီအခြေအနေ ဆက်လက်တည်ရှိမယ့်ကာလကို အတိုဆုံးဖြစ်အောင် လျှော့ချဖို့ လိုအပ်တယ်လို့ သူက တိုက်တွန်းထားပါတယ်။

ရာသီဥတုပြောင်းလဲမှုကြောင့် ရေကြီးရေလျှံမှုတွေ၊ အပူလှိုင်းတွေနဲ့ တောမီးလောင်ကျွမ်းမှုတွေဟာ လူမှုအသိုင်းအဝိုင်းတွေအပေါ် ဆိုးရွားတဲ့သက်ရောက်မှုတွေ ဖြစ်ပေါ်စေနေပြီလို့လည်း ဂူတာရက်စ်က ပြောပါတယ်။

ကမ္ဘာ့ဖန်လုံအိမ်ဓာတ်ငွေ့ထုတ်လွှတ်မှု စုစုပေါင်းရဲ့ လေးပုံသုံးပုံခန့်ကို G20 အဖွဲ့ဝင်နိုင်ငံတွေက ထုတ်လွှတ်နေတာ ဖြစ်တဲ့အတွက် အဲဒီနိုင်ငံတွေ၊ အထူးသဖြင့် ထုတ်လွှတ်မှုအများဆုံးနိုင်ငံတွေက ပိုမိုပြင်းထန်တဲ့ အရေးယူဆောင်ရွက်မှုတွေ လုပ်ဆောင်ဖို့ လိုအပ်တယ်လို့ သူက ဆိုပါတယ်။

ဒီကိစ္စဟာ နိုဝင်ဘာလမှာ တူရကီနိုင်ငံ၌ ကျင်းပမယ့် ကုလသမဂ္ဂ ရာသီဥတုပြောင်းလဲမှုဆိုင်ရာ ထိပ်သီးညီလာခံမှာ ကမ္ဘာ့ခေါင်းဆောင်တွေ ရင်ဆိုင်ဖြေရှင်းရမယ့် အဓိကစိန်ခေါ်မှုတစ်ရပ် ဖြစ်လာမှာပါ။

#ရာသီဥတု

#ကမ္ဘာ့အပူချိန်

#ဖန်လုံအိမ်ဓါတ်ငွေ့

#ကုလသမဂ္ဂ

ဆက်စပ်သတင်းများ

Eastern Thanlwin