၂၉ စက်တင်ဘာလ ၂၀၂၆ (Eastern ThanLwin)
ကြည်ညို
တနင်္သာရီတိုင်းဒေသကြီးအတွင်းရှိ ရဲတံခွန်ကမ်းလွန် သဘာဝဓာတ်ငွေ့စီမံကိန်းမှာ လက်ရှိ ထုတ်လုပ်နေခြင်းမရှိတော့တဲ့ သဘာဝဓာတ်ငွေ့တွင်း (၁၀)တွင်းကို ပိတ်သိမ်းဖို့ စီစဉ်နေတယ်လို့ တနင်္သာရီတိုင်းဒေသကြီးအစိုးရအဖွဲ့က အသိပေးထုတ်ပြန်ပါတယ်။
အဆိုပါ ဓာတ်ငွေ့တွင်းတွေဟာ ရဲတံခွန်ကမ်းလွန်လုပ်ကွက် M-12၊ M-13 နဲ့ M-14 အတွင်းမှာရှိပြီး တွင်းတွေကို ပိတ်သိမ်းရုံသာမက အပြီးတိုင် စွန့်လွှတ်ပိတ်သိမ်းတဲ့ “Plug and Abandonment” လုပ်ငန်းတွေလည်း ဆောင်ရွက်သွားဖို့ရှိတယ်လို့ သိရပါတယ်။
ဒါပေမဲ့ ဓာတ်ငွေ့တွင်းတွေ မပိတ်သိမ်းခင်မှာတော့ စီမံကိန်းရဲ့ ပတ်ဝန်းကျင်ထိခိုက်မှုတွေကို အရင်ဆုံး ဆန်းစစ်သွားမှာဖြစ်ပါတယ်။
အဲဒီ EIA လုပ်ငန်းတွေကို Gulf Petroleum Myanmar က ဆောင်ရွက်သွားမှာဖြစ်ပြီး စက်တင်ဘာ ၂၅ ရက်ကလည်း စီမံကိန်းရဲ့ ပတ်ဝန်းကျင်ဆိုင်ရာအကြံပေးကုမ္ပဏီ Unique Environment Myanmar (UEM) က လေ့လာဆန်းစစ်မယ့် အစီအစဉ်တွေကို တနင်္သာရီတိုင်းဒေသကြီး ဝန်ကြီးချုပ်ထံ ရှင်းလင်းတင်ပြခဲ့တယ်လို့ သိရပါတယ်။
Gulf Petroleum Myanmar ဟာ ရဲတံခွန်စီမံကိန်းကနေ ထွက်ခွာသွားတဲ့ မလေးရှားအခြေစိုက် Petronas ရဲ့ ရှယ်ယာတွေကို MOGE နဲ့အတူ လွှဲပြောင်းရယူပြီးနောက် စီမံကိန်းရဲ့ Operator အဖြစ် လုပ်ကိုင်နေတဲ့ ကုမ္ပဏီဖြစ်ပါတယ်။
ဒါ့အပြင် မုတ္တမကမ်းလွန်က M-10 လုပ်ကွက်မှာ “မင်းရဲသူစီမံကိန်း” အဖြစ် သဘာဝဓာတ်ငွေ့ ရှာဖွေဖော်ထုတ်ရေးလုပ်ငန်းတွေကိုလည်း လုပ်ကိုင်ခွင့်ရရှိထားပါတယ်။
လက်ရှိ မြန်မာနိုင်ငံမှာ ရတနာ၊ ရဲတံခွန်၊ ဇောတိကနဲ့ ရွှေစတဲ့ ကမ်းလွန်ရေနံနဲ့ သဘာဝဓာတ်ငွေ့စီမံကိန်းကြီး ၄ ခု ကနေ ရှာဖွေ၊ တူးဖော်၊ ထုတ်လုပ်တဲ့အပြင် ထပ်မံရှာဖွေတူးဖော်ပြီး ထုတ်လုပ်နိုင်ရေးအတွက် ဆောင်ရွက်နေတဲ့ ကမ်းလွန်စီမံကိန်းကြီး ၂ ခုလည်း ရှိနေပါတယ်။
