ဘဏ်တွေကို စုပေါင်းပြီး အရည်အသွေးမြင့်တဲ့ ဘဏ်ကြီးတွေ ဖြစ်ရေး အစိုးရကို တိုက်တွန်းကြောင်း အဆိုတင်သွင်း

၂၉ စက်တင်ဘာ ၂၀၂၆ (Eastern ThanLwin)

NPW

မြန်မာနိုင်ငံ ပြည်တွင်းဘဏ်တွေ အရေအတွက်လျော့ချပြီး ပိုမိုခိုင်မာ အင်အားကြီးပြီး အရည်အသွေးမြင့်တဲ့ ဘဏ်တွေပေါ် ပေါက်လာရေးအတွက် အစိုးရကို တိုက်တွန်းကြောင်းအဆိုကို လှိုင်သာယာ(အရှေ့ပိုင်း)မဲဆန္ဒနယ်က ဦးအေးချမ်းက စက်တင် ဘာ ၂၈ ပြည်သူ့လွှတ်တော်အစည်းအဝေးမှာ တင်သွင်းခဲ့တာဖြစ်ပါတယ်။

“ ဘဏ်သေးတွေကို ပိတ်ခိုင်းတာမဟုတ်ပါဘူး။ ဘဏ်သေးတွေကို ပေါင်းခိုင်းတာပါ။ ပေါင်းစပ်ပြီး ကြီးအောင်လုပ်ဖို့ တွန်းအားပေးပြီး အချိန်ကာလတစ်ခုတွင်း မပေါင်းစပ်နိုင်ရင်၊ မပေါင်းစပ်လာရင် အစိုးရက ဦးဆောင်ပေါင်းစပ်ပေးဖို့ အကြံပြုအပ် ပါတယ် ” လို့ ဦးအေးချမ်းက ဆိုပါတယ်။

လက်ရှိမြန်မာနိုင်ငံမှာ ပုဂ္ဂလိကဘဏ် ၃၀ ကျော်ရှိပြီး ဘဏ်ကြီး ၅ ခုမှာသာ Swift Transfer နဲ့ Correspondent Accounts Facilities ရှိပြီး ကျန်ဘဏ်တွေမှာ နိုင်ငံတကာက အသိအမှတ်ပြုထားတာမရှိတဲ့အတွက် ဘဏ်ကြီးတွေကိုပဲ လက်ခံသလို ဖြစ်နေတယ်လို့လည်း ပြောပါတယ်။

ဒါ့အပြင် အိမ်နီးချင်းနိုင်ငံတွေဖြစ်တဲ့ စင်ကာပူမှာဆို တစ်နိုင်ငံလုံးအတိုင်းအတာအနေနဲ့ ဘဏ် ၅ ဘဏ်၊ ထိုင်းမှာ ၁၄ ဘဏ်၊ မလေးရှားမှာ ၈ ဘဏ်သာရှိပေမယ့် နိုင်ငံ့ GDP ကိုလည်း များစွာအထောက်အကူပြုပြီး မြန်မာနိုင်ငံရှိ ဘဏ် ၃၀ ကျော်က နိုင်ငံ့ GDP ကို အနည်းငယ်သာ အထောက်အကူပြုနေနိုင်တယ်လို့ ဆိုပါတယ်။

“ ဒါကို ကြည့်ခြင်းအားဖြင့် မြန်မာနိုင်ငံဘဏ်တွေက အရည်အသွေးမြှင့်တင်ဖို့ အများကြီးလိုနေပြီဆိုတာကို ကြည့်လို့ရပါ တယ်။ နောက်ဆုံးရည်ရွယ်ချက်ကတော့ ကျွန်တော်တို့ မြန်မာနိုင်ငံမှာ ပိုမိုခိုင်မာတဲ့ ဘဏ်တွေရှိဖို့ပါပဲ။ ဘဏ်များများရှိဖို့ အရေအတွက်ထက် ခိုင်မာတဲ့ဘဏ်ကြီးတွေရှိဖို့ လိုနေပါပြီ။ ဘဏ်သေးသေးမွှားမွှားတွေ အများကြီး မလိုအပ်တော့ပါဘူး။ အခုအချိန်အထိ ကိုယ့်ဘဏ်အပ်ငွေတွေကို ထုတ်ချင်သလောက် ထုတ်ချင်တဲ့အချိန်မှာ ထုတ်လို့မရ ဘဏ်တွေရှိနေပါတယ် ” လို့လည်း အဆိုရှင် ဦးအေးချမ်းက ပြောပါတယ်။

စင်ကာပူအစိုးရအနေနဲ့ ၂၀၀၁ ခုနှစ်အတွင်းမှာ ပြည်တွင်းဘဏ် ၂၀ ကျော်ကို ဘဏ်ကြီး ၃ ခုအဖြစ် ပေါင်းစပ်ပေးခဲ့လိုက်တဲ့ အတွက် နိုင်ငံ့ဘဏ်လုပ်ငန်းစနစ်နဲ့ ပင်မဒေါက်တိုင်တွေ ဖြစ်တယ်လို့ ဆိုပါတယ်။

အဆိုကို ကန့်ကွက်သူမရှိတဲ့အတွက် ပြည်သူ့လွှတ်တော်က လက်ခံဆွေးနွေးဖို့ ဆုံးဖြတ်ခဲ့ပါတယ်။

#စီးပွားရေး

#ပုဂ္ဂလိကဘဏ်

#စင်ကာပူ

#ပြည်တွင်းဘဏ်

#စီးပွားရေးဘဏ်