Language:

ပို့ကုန်ရငွေ အသုံးပြုခွင့်ကာလကို ဗဟိုဘဏ် တိုးမြှင့်သတ်မှတ်


ပို့ကုန်ရငွေ အသုံးပြုခွင့်ကာလကို ဗဟိုဘဏ် တိုးမြှင့်သတ်မှတ်

၁၀ နိုဝင်ဘာ ၂၀၂၆ (Eastern ThanLwin)

ကြည်ညို

ပို့ကုန်လုပ်ငန်းရှင်တွေ ပို့ကုန်ရငွေထဲက ကိုယ်တိုင်အသုံးပြုခွင့်ရှိတဲ့ နိုင်ငံခြားငွေကို ဘဏ်စာရင်းမှာ ထားရှိနိုင်တဲ့ကာလကို ယခင် ရက် ၃၀ အစား ရက် ၄၅ ရက်အထိ တိုးမြှင့်ပေးလိုက်ကြောင်း မြန်မာနိုင်ငံတော်ဗဟိုဘဏ်က ထုတ်ပြန်ထားပါတယ်။

ယခင်က ပို့ကုန်ရငွေထဲမှ ကိုယ်တိုင်သုံးစွဲနိုင်တဲ့ နိုင်ငံခြားငွေကို ပုဂ္ဂလိက နိုင်ငံခြားငွေစာရင်းမှာ ရက် ၃၀ အထိသာ ထားရှိခွင့်ပြုထားတာဖြစ်ပြီး အခုအခါမှာတော့ နောက်ထပ် ၁၅ ရက် တိုးမြှင့်သတ်မှတ်ပေးလိုက်တာ ဖြစ်ပါတယ်။

အဆိုပါ သတ်မှတ်ချက်ကို ၂၀၂၂ ခုနှစ် ဩဂုတ် ၁၆ ရက်က ထုတ်ပြန်ခဲ့တဲ့ ဗဟိုဘဏ်ရဲ့ စာအမှတ် အက်ဖ်အီး-၁/ပက/၁၉၅၆ အရ သတ်မှတ်ထားခဲ့ခြင်းဖြစ်ပြီး ပို့ကုန်ရငွေတွေကို နိုင်ငံခြားငွေစာရင်းအတွင်း ထည့်သွင်းထားရှိရမယ့် ကိစ္စနဲ့ပတ်သက်ပြီး နိုင်ငံခြားသုံးငွေစီမံခန့်ခွဲမှုဥပဒေ ပုဒ်မ ၃၈-ခ မှာလည်း ပြဋ္ဌာန်းထားပါတယ်။

ယခုလို ထားရှိခွင့်ကာလ တိုးမြှင့်ပေးတာဟာ ပို့ကုန်လုပ်ငန်းရှင်တွေ သွင်းကုန်လိုင်စင်လျှောက်ထားတာ၊ ပြည်ပကို ငွေပေးချေတာတွေအတွက် အချိန်ပိုရရှိစေဖို့နဲ့ ပို့ကုန်၊ သွင်းကုန်လုပ်ငန်းတွေအကြား နိုင်ငံခြားငွေ လည်ပတ်အသုံးပြုမှု ပိုမိုအဆင်ပြေစေဖို့ ရည်ရွယ်တာဖြစ်ကြောင်း ဗဟိုဘဏ်ရဲ့ ထုတ်ပြန်ချက်မှာ ဖော်ပြထားပါတယ်။

ဒါကြောင့် ပြောင်းလဲသတ်မှတ်ချက်အရ ပို့ကုန်လုပ်ငန်းရှင်တွေဟာ မိမိတို့ကိုယ်တိုင် အသုံးပြုခွင့်ရှိတဲ့ ပို့ကုန်ရငွေကို နိုင်ငံခြားငွေဘဏ်စာရင်းမှာ ရက် ၄၅ ရက်အထိ ဆက်လက်ထားရှိနိုင်တော့မှာ ဖြစ်ပါတယ်။

ဒီလို ထားရှိခွင့်ကာလ တိုးမြှင့်ပေးလိုက်တာကြောင့် နောက်ပိုင်းမှာ ပို့ကုန်လုပ်ငန်းရှင်တွေအနေနဲ့ ပို့ကုန်ရငွေကို အလျင်စလို အသုံးပြုရတာမျိုး လျော့နည်းလာနိုင်ပြီး သွင်းကုန်လိုင်စင် လျှောက်ထားခြင်းနဲ့ ပြည်ပငွေပေးချေမှုတွေကို ပိုမိုစနစ်တကျ စီစဉ်ဆောင်ရွက်လာနိုင်ပါတယ်။

ဒါ့အပြင် လုပ်ငန်းလည်ပတ်မှုအတွက် လိုအပ်တဲ့ နိုင်ငံခြားငွေကို အချိန်ပိုကြာကြာ ထိန်းသိမ်းထားနိုင်ခြင်းက ပို့ကုန်၊ သွင်းကုန်လုပ်ငန်းရှင်တွေရဲ့ ငွေကြေးစီမံခန့်ခွဲမှုကို အထောက်အကူဖြစ်စေနိုင်သလို ကုန်သွယ်မှုလုပ်ငန်းစဉ်တွေမှာလည်း ပိုမိုအဆင်ပြေလာနိုင်ပါတယ်။

သို့သော် နိုင်ငံခြားငွေဈေးကွက်အပေါ် ဘယ်လောက်အထိ အကျိုးသက်ရောက်မှုရှိလာမလဲဆိုတာကတော့ လက်တွေ့အကောင်အထည်ဖော်မှုနဲ့ နောက်ဆက်တွဲမူဝါဒ အပြောင်းအလဲတွေအပေါ် မူတည်လျက်ရှိပါတယ်။

#စီးပွားရေး

#နိုင်ငံခြားငွေဈေး

#ပို့ကုန်သွင်းကုန်

#ငွေကြေးစီမံကိန်း

ဆက်စပ်သတင်းများ

Eastern Thanlwin