၁၂ အောက်တိုဘာ ၂၀၂၆ (Eastern ThanLwin )
ဖိုးစည်
NSPNC ရဲ့ ဥက္ကဋ္ဌလည်းဖြစ် ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီရဲ့ ဥက္ကဋ္ဌလည်းဖြစ်တဲ့ ဒုတိယ ဗိုလ်ချုပ်ကြီး ရာပြည့်ကို ကာကွယ်ရေးဝန်ကြီးအဖြစ် ခန့်အပ်ဖို့ ပြည်ထောင်စု လွှတ်တော်ကို အမည်စာရင်း တင်သွင်းထားတယ်လို့ သိရပါတယ်။
ဒီကနေ့ အောက်တိုဘာ ၁၂ ရက်မှာ ကျင်းပတဲ့ ပြည်ထောင်စုလွှတ်တော်အစည်းအဝေးမှာ လွှတ်တော်နာယက ဦးအောင်လင်းဒွေးက လွှတ်တော် ကိုယ်စားလှယ်တွေကို အသိပေးခဲ့တာပါ။
ဒုတိယ ဗိုလ်ချုပ်ကြီး ရာပြည့်ဟာ စစ်တပ်ရဲ့ ဒုတပ်ချုပ်ဖြစ်ခဲ့သူ ဒုတိယဗိုလ်ချုပ်မှူးကြီး စိုးဝင်းနဲ့ အပတ်စဉ်တူ စစ်တက္ကသိုလ် အပတ်စဉ်(၂၂)က သင်တန်းဆင်းလာသူဖြစ်ပြီး တပ်မတော်ဆေးတက္ကသိုလ် ကျောင်းအုပ်ကြီး၊ အရှေ့ပိုင်းတိုင်းစစ်ဌာနချုပ်တိုင်းမှူး၊ စစ်ဥပဒေချုပ် တာဝန်များကို ထမ်းဆောင်ခဲ့ဖူးပါတယ်။
နိုင်ငံတော်လုံခြုံရေးနှင့် ဖွံ့ဖြိုးရေးကောင်စီ အစိုးရ လက်ထက်မှာ ပြည်ထောင်စုအစိုးရအဖွဲဝန်ကြီး၊ နယ်စပ်ရေးရာ ဝန်ကြီး၊ ပြည်ထဲရေးဝန်ကြီးနဲ့ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်အဖြစ်လည်း တာဝန်ထမ်းဆောင်ခဲ့ဖူးပါတယ်။
ဒါ့အပြင် တပ်မတော်လေ့ကျင့်ရေး အရာရှိချုပ်တာဝန်နဲ့ စစ်ဆင်ရေးအထူးအဖွဲမှူး တာဝန်တို့ကိုလည်း ထမ်းဆောင်ခဲ့ပြီး လက်ရှိမှာ ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ၏ ဥက္ကဋ္ဌ နဲ့ NS PNC ရဲ့ ဥက္ကဋ္ဌ အဖြစ် တာဝန်ထမ်းဆောင်လျက်ရှိပါတယ်။
ဒုတိယ ဗိုလ်ချုပ်ကြီး ရာပြည့်နဲ့အတူ လူမှုဝန်ထမ်း၊ ကယ်ဆယ်ရေးနဲ့ ပြန်လည်နေရာချထားရေးဝန်ကြီးဌာန ပြည်ထောင်စု ဝန်ကြီးအဖြစ် ဒေါက်တာ ကိုကိုလွင်ကို ခန့်ထားဖို့ကိုလည်း သမ္မတ ဦးမင်းအောင်လှိုင်က ပြည်ထောင်စုလွှတ်တော်ကို အမည်စာရင်းတင်သွင်းထားတယ်လို့ သိရပါတယ် ။
ပြည်ထောင်စုဝန်ကြီးအဖြစ် ခန့်အပ်တာဝန်ပေးလိုကြောင်း အမည်စာရင်းတင်ပြထားတဲ့ ပုဂ္ဂိုလ်နှစ်ယောက်နဲ့ ပတ်သက်လို့ အတည်ပြုခန့်အပ်တာ ဒါမှမဟုတ် ကန့်ကွက် အဆိုတင်သွင်းတာကို ပြည်ထောင်စုလွှတ်တော် တတိယပုံမှန် အစည်းအဝေး ပဉ္စမနေ့မှာ ဆက်လက်ဆောင်ရွက်မှာဖြစ်တယ်လို့ ပြည်ထောင်စုလွှတ်တော် နာယက ဦးအောင်လင်းဒွေးက ပြောကြားသွားပါတယ်။

